Chwilio Cofnodion
Safonau
Mae Cofnod Henebion Cenedlaethol Cymru yn cynnwys gwybodaeth am 70,000 o safleoedd ledled Cymru ac archif o filiwn a rhagor o eitemau. I reoli casgliad o’r fath, rhaid wrth safonau uchel o fynegeio a dulliau effeithlon o adfer gwybodaeth.
Y Comisiwn Brenhinol yw’r sefydliad sy’n arwain yng Nghymru o ran datblygu’r safonau hynny, a bydd yn cysylltu â chyrff tebyg yng Nghymru a gwledydd eraill i sicrhau eu bod yn gydnaws â’r safonau a ddefnyddir gan sefydliadau eraill. Gyda chymorth ein cydweithwyr yn Amgueddfa Cymru, Cadw a phedair Ymddiriedolaeth Archaeolegol Cymru, mae’r Comisiwn Brenhinol wrthi’n datblygu thesawrws o fathau o henebion ar gyfer Cymru. Mae cynlluniau ar y gweill hefyd i lunio fersiwn Cymraeg o’r thesawrws.
Y safonau dan sylw sydd wrth wraidd y mecanweithiau adfer a ddefnyddir ar gyfer y gronfa ddata ar-lein, Coflein. Mae’r gwasanaeth hwnnw’n fodd i gael gwybodaeth am filoedd o safleoedd archaeolegol, henebion, adeiladau a safleoedd arforol ledled Cymru, ac mae’n eu cysylltu â’r lluniadau, y llawysgrifau, y ffotograffau a’r delweddau digidol sydd i’w cael yng nghasgliadau archifol CHCC.
Informing the Future of the Past: Guidelines for Historic Environment Records
(IFP2) (Ail Argraffiad, 2007)
Y set hanfodol o ganllawiau gweithio sy’n briodol i bob Cofnod o’r Amgylchedd Hanesyddol, boed fawr neu fach, ac i’r holl staff, gwirfoddolwyr a myfyrwyr sy’n ymwneud â rheoli, rhedeg, defnyddio neu gynorthwyo’r cofnod hwnnw.
Yn yr argraffiad hwn, cafodd yr argraffiad cyntaf ei ailwampio a’i ehangu’n helaeth er mwyn iddo gynnwys datblygiadau diweddar a rhoi sylw i Gymru a’r Alban yn ogystal â Lloegr. Gellir ei weld ar-lein yn rhad ac am ddim neu ei lwytho i lawr o www.ifp-plus.info.